Журналистиканы жетілдіру –  маңызды міндет

Мемлекет басшысы ұсын­ған «Рухани жаңғыру» бағдар­ла­мас­ын жүзеге асыруда бұқаралық ақ­парат құралдары маңызды рөл атқаратындығын ескере оты­­рып, журналист кадрларды даяр­­лаудың сапасын артты­ру мә­се­лесін күн тәртібіне шыға­ра­тын кез жетті деп санаймыз. Осыған орай Премьер-Министрдің орынба­сары Е.Досаевқа депутаттық сау­алмен мынадай ұсыныстар жолдадық:

1) Болашақ журналистерді даярлайтын негізгі оқу орындары болып табылатын әл-Фараби атындағы ҚазҰУ мен Л.Н. Гу­милев атындағы ЕҰУ жур­налистика факультеттерінің әлеу­еттерін барынша толық та, тиімді пайдалану қажет. Атал­­ған факультеттер рухани жаң­ғы­ру қозғалысының алғы шеб­і­нен көрініп, мемлекеттік ақ­па­рат­тық саясатты табысты жү­зе­ге асыратын қоғамдық пікір көш­бас­шыларын даяр­лайтын, бір кез­де­гідей беделі өте жоғары, эли­талық дең­гейдегі журналист кадр­лар ұс­таханаларына айналдырылса артық болмас еді. Олар ең алдымен мемлекеттік БАҚ-тарға және мемлекеттік органдардың баспасөз қызметтеріне қажетті жоғары білікті маман кадрларды даяр­лауға мамандандырылғаны жөн деп білеміз. Осыған орай атал­­ған университеттерге «Жур­на­л­истика» мамандығы бойынша мем­лекеттік білім беру гранттарын мақсатты түрде бөлу тетігін қа­растыру қажет.

Бұған қоса, жоғарыда аталған екі ұлттық университеттің жур­на­листика факультеттері мен мем­­лекеттік ақпарат құрал­да­ры­­ның арасындағы байланыс ба­рын­ша нығайтылып, болашақ жур­налистердің өндірістік практи­ка­дан өтуі жүйелі түрде жолға қойы­лса игі. Бұл мемлекеттік БАҚ-тар басшыларының дарынды жас журналистерді дер кезінде та­­нып-біліп, жұмысқа қабылдап, шы­­ғармашылық ұжымдарды тың күш­пен нығайтуларына мүм­кін­дік берер еді;

2) Қазір елімізде 2547 газет пен журнал, 115 телеарна, 65 ра­дио, 196 ақпарат агенттігі мен же­­лілік басылым бар. Оларға қоса, орталық және өңірлік атқа­ру­шы органдардың баспасөз қыз­меттеріне де білікті журналист­ер қажет. Бүгінгі күні жұмыс бе­рушілер «Еңбек» электронды ең­бек биржасы арқылы өздерінде бос тұрған 133 журналистік қыз­мет орнын ұсынып отыр. Шын мәнінде білікті журналистерге сұраныс одан да көп екендігі анық. Сондықтан да «Жур­налистика» мамандығы бойынша бөлінетін мемлекеттік білім беру гранттары санының жылдан-жылға кемітілу үрдісімен келісу қиын. Мәселен, 2016-2017 оқу жылына 90 грант бөлінген болса, үстіміздегі оқу жылында оның саны 70-ке дейін азайтылған. Осыған орай Ақпарат және коммуникациялар министрлігі республикадағы БАҚ-тардың және мемлекеттік органдардың бас­­пасөз қызметтерінің білік­ті журналист кадрларына сұра­ныс­тарын нақты зерттеп біліп, «Журналистика» маман­ды­ғы бойынша бөлінетін гранттар санын көбейту жөнінде ұсыныс әзірлегені жөн;

3) Қазіргі кезде жоғары оқу орындарын бітірген жас журналистер аймақтарға барғылары кел­мей, көпшілігі қалаларда қа­лып жүр. Соның салдарынан, әсі­ресе солтүстік өңірлерде аудан­дық газеттерді, негізінен, жаст­а­ры алпыстан асып, жетпіске жа­қ­ындаған қарт журналистер шығарып жүр. Алдағы уақытта олардың орындарын кімдер басатынын ойластырғанымыз абзал. Сондықтан да аудандық газеттерге жұмысқа орналасуға келісім бере­тін жас журналистерді «Дип­ломмен – ауылға!» әлеу­мет­тік бағдарламасына енгізуді де ұсынамыз.

Кәрібай МҰСЫРМАН,

Мәжіліс депутаты